الفاتح النقر يصوب مدفعية ثقيلة: (شداد ده هرم رياضي كبير بيقدر يتعامل مع حسن برقو ده كيف ؟!!)

0
971


الفاتح النقر يطلق النار في كل الاتجاهات في حوار الساعات الطوال مع (المشاهد)..

(شداد ده هرم رياضي كبير بيقدر يتعامل مع حسن برقو ده كيف ؟!!)

نحن فرحنا ببرونزية الشان لاننا جهلاء ومستوى منتخبنا الاخير ده بيضحك الناس علينا

الرياضة محتاجة لوقفة وما ممكن الدولة تجيب لينا وزير الرياضة من الحرب والغابة.. !!

الهلال رغم تميزه المحلي عندو مشكلة فنية.. يكفي انه لم يحقق الفوز في ست مباريات في المجموعات

هذه هي مشكلة الاهلي شندي والخرطوم الوطني والمريخ والهلال.. وانا مع تخفيض كشوفات اندية الممتاز في هذه الحالة.. !!

هذه اسباب التعاقد مع المدربين الاجانب في السودان.. ولكن لم ينجح منهم احد..


اجرت صحيفة المشاهد حوارا ساخناً مع الكابتن والمدرب الفاتح النقر وادلى خلاله بالكثير من التصريحات الساخنة التي سيكون لها ما بعدها حيث انتقد النقر طريقة ادارة الكرة في البلاد وقال بالحرف: (شداد عشان يمشي صاح لازم يكون معاهو اتنين شداد) ثم عرج للحديث عن المنتخبات الوطنية وطريقة ادارتها مبينا بان منصب رئيس لجنة المنتخبات الوطنية منصب فني فكيف يشغله الآن حسن برقو واضاف: (لو عندك قروش في البلد دي تعمل الغلط وتعمل العايزو ومافي زول بسألك) و… (هسه عليكم الله شداد ده زول هرم رياضي قاعد يتعامل مع حسن برقو ده كيف) ؟ ثم عرج الكوتش النقر للحديث عن الاندية وقال ان الطريقة التي يدار بها الهلال طريقة خاطئة فنياً مشيرا الى ان الهلال ادى ست مباريات في البطولة الافريقية الكونفيدرالية ولم يحقق الفوز لان المشكلة فنية وليست مشكلة لاعبين.. الهلال يضم افضل العناصر.. وقال: نحن ما بنشيل بطولات خارجية الى يوم الدين الا بالصدفة.. الكورة السودانية ما منها رجاء ولا امل وانا كمدرب مافي زول فاهمني وانا عارف كده.. المستوى الظهر بيهو منتخبنا بيضحك الناس علينا.. نحن فرحانين ببرونزية الشان لانو ناسنا جهلاء.. بطولة الشان اصلا عملوها عشان تفرز وجوه جديدة لكن منتخبنا يشارك فيها بالصف الاول.. مفروض نشرك فيها ناس الثعلب والنعسان و.. و.. ولم ينس الكوتش الفاتح النقر الاعلام وقال ان مزمل ابو القاسم ينتقد الاسلوب الذي اسماه بالخندقة لانو بشوف غلط وما لعب كورة.. ثم عاد النقر وانتقد الدولة في اختيارها لوزراء الرياضة السابقين وقال: (قول لي ياتو وزير مسك الرياضة لعب كورة .. ديل بجيبوهم من الغابة والحرب عشان يديروا الرياضة في البلد.. اذن لن ننجح اذا كانت هذه هي سياسة الدولة).. المثير الخطير في الحوار الذي سينشر لاحقاً حيث تحدث عن فترته القصيرة في اهلي شندي واسباب تراجع الفريق والمراحل السنية والغاء الرديف وتخفيض كشوفات الاندية الى 25 لاعباً ثم انهى الحوار بسؤال للرأي العام.. انتوا ناس برقو وحميدتي ديل جبتوهم من وين ؟!!… تابعونا..

ترك الرد

Please enter your comment!
Please enter your name here