الفاتح النقر يخرج الهواء الساخن في حوار مطول مع (المشاهد)

شداد عايز معاهو تاني اتنين شداد عشان يفهموهو والكورة تمشي صاح.. !!

الدوري في السودان لو مشى بالطريقة دي اللعيبة بموتو.. !!

نحن ما عندنا تخطيط سليم ووزير الرياضة نجيبو من الغابة والحرب.. !!

تراه هادئاً للولهة الاولى ولكنه سرعانما يمور ويصول و(يتهيج).. عندما يسأل عن حال الكرة السودانية.. لا يجامل ولا (يزوق) الكلام.. وهو على استعداد دائماً على ان يقول لـ(اتخن تخين انت اعور في عينه).
إلتقيته عابراً في دار الرياضة بام درمان, استأذنته في حوار فقال لي (حوار شنو ياخي يا كبوش.. نقول شنو يعني).. ؟؟ قلت له قل الذي تريد ان تقوله.. عن حال الكرة السودانية.. حاضرها ومستقبلها.. اسباب تخلفها ومكامن تقدمها..
تحدث في الكثير وسرقنا الوقت لاكثر من ثلاث ساعات.. الفاتح النقر يتكلم وانا استمع إليه فخوراً بصراحته.. قال اشياء كثيرة ستظل حبيسة في هذا التسجيل.. ولكن الاهم منها انه سدد هدفاً ذهبيا في شباك السودان عندما قال انه لا امل في الكرة السودانية.. بشع باللاعبين وخص لاعبي القمة بالكثير.. نترككم معه.. المتشار الفني لنادي الاهلي شندي والكوتش الكبير الفاتح النقر:

…………………..؟

اللاعب بجيني عمرو تلتين سنة انا اعمل ليهو شنو.. ده لاعب لا حيتصلح في التمرير ولا حيتعلم طريقة الاستلام الصحيح اضافة الى اننا في السودان ما بنشوف صاح ولا نستفيد من رؤيتنا للعالم بيلعب الكورة كيف.. هناك مافي حاجة اسمها دفاع وحاجة اسمها هجوم.. العالم يؤدي الكرة ككتلة واحدة.. نحن الكلام ده ما عندنا في السودان والصحافة والمدربين واللاعبين مازالوا يتحدثون عن كيفية خطط الملعب والباك وصانع الالعاب.. ده كلام مافي بره.. هناك وظائف اسمية ولكن الحكم لما يصفر هذه الوظائف تندمج مع بعضها تلقى المهاجم في منطقة الدفاع والعكس حسب حركة الكرة لكن كل ذلك يحدث بطريقة علمية حديثة ونحن ما وصلنا المرحلة دي.. عشان كده انت مهما تجيب مدرب لن يستطيع ان يعمل شيء للكرة السودانية التي لن تتطور مالم تبدأ البداية الصاح من تحت.. يعني الهلال يقولو ليك عندو شباب والمريخ عندو شباب والخرطوم الوطني عندو شباب وعندهم رديف وناشئين.. وين هؤلاء اللاعبين ؟ منو البعلمهم ؟ انا مشيت شفت تعليمهم.. وجدته صفر على الشمال..

…………………..؟

نحن بنجيب المدربين الاجانب منظرة بس.. الاتحاد العام بجيب مدرب اجنبي ويقول عشان ما ادخل في مشكلة اجيب مدرب اجنبي وكذلك الاندية.. الجمهور بيرفض وجود المدرب السوداني ولا يصبر عليه لذلك تلجأ الادارات للمدرب الاجنبي وحتى اذا فشل هذا المدرب الجماهير ما بتقول حاجة.. لذلك ادارات الاندية بتجيب لاعبين اجانب (فشنك) وده تهرب يؤكد عدم معرفة هذه الادارات بالكرة.. انا لو رئيس الاتحاد شخصيا ما بخلي مدرب اجنبي ولا لاعب اجنبي يدخل البلد دي.. يدخل لى شنو.. لانو انت لو داير تجيب مدرب اجنبي مفروض تجيب مدرب يبدأ من تحت لانو الفوق ديل خلاص ما بنفعو تاني.. المدرب بجي يلقى اللاعبين الكبار ناقصين الكتير في الاساسيات ح يعمل ليهم شنو.. شوف السودان جاب كم مدرب اجنبي حتى الآن.. النجح فيهم منو.. حتى هورست البتكلمو عنو الناس بانو احدث نقلة انا في اعتقادي ما عمل حاجة حتى عندما كان مدربا للمريخ حصل الهلال على الدوري.. صحيح هو احدث تغيير في تنظيم اللعب ولكن لا يوجد اي نجاح بدون بطولات.

…………………..؟

مافي اي مدرب بيقدر يعمل حاجة في المنتخب الوطني السوداني لانو اللاعب اصلا ما مؤهل.. المشكلة عندنا جهل في معرفتنا بالكورة لا صحافة ولا اداريين ولا لاعبين (كلهم ماحين) والناس ما بترضى تسمع الحقيقة.

…………………..؟

نحن ما عندنا تخطيط سليم ولا رؤية عشان كده ما ممكن نتطور ونمشى الى الامام.. ياخي ديل بيقولو للرئيس نحن سنة 22 عايزين نشارك في كاس العالم في قطر.. دي رؤيتهم.. تفتكر ناس زي ديل بستحقو الاحترام.. ؟ هذا كلام لا يصدق.. هذا غش.. وانا قلت للسيد الرئيس السودان ما بيمشي كاس العالم لا 22 ولا 30 لانو مافي شغل ماشي صاح يخلينا نحلم بكده.. انت عشان تصل لكاس العالم سنة كذا بتخطط ليهو قبل عشرة سنة لكن انت ما خططت وقاعد في محلك وتقول عايز تشارك في كاس العالم .. وين المدراس السنية.. في السودان كلو هناك مدارس سنية ولكنها مدارس شارع ساي.. عشوائية.

…………………..؟

الاندية في السودان عاملة ليها مراحل سنية وانا اعتقد انها اندية بليدة .. اخطر مرحلة في تاريخ اللاعب هي المرحلة السنية وافضل المدربين في العالم بجيبوهم للمدارس السنية وليس العكس.. انا شخصيا خضت هذه التجربة في الهلال مع الرديف.. جا مدرب اجنبي مسك الفريق الاول وانا مشيت الرديف وما كنت عارف انو الرديف اصلا ما عندو منافسة لكن اهم حاجة قلتها لادارة النادي انو الفريق الرديف ده لو راجيين منو حاجة لى قدام تكون بلده.. لان اللاعب الرديف جايي عمرو 23 سنة لذلك ما اخدت معاهم اي وقت وحاولت اعلمهم حاجة واحدة فقط هي كيف يهاجمو وكيف يدافعو ودي البقدر عليها لكن ما بقدر اصلح مهاراتهم.. لكن النادي بتاعي ذاتو ما كان فاهم انا عملي ده شنو بدليل انا قاعد بره لعبو سبعة من لاعبي الرديف مع الفريق الاول في الدوري ضد النسور غلبو خمسة وقدمو كورة جميلة.. ولكن الهلال اجهض التجربة لانو الاتحاد اصلا اجهضها.. ياخي الاتحاد العالم بيعمل ليهو رديف بدون منافسة ده بيحصل وين في العالم.. الرديف والفريق الاول واحد.. زي ما بتجيب مدرب كبير بتيجب للرديف فريق كبير لانو السن واحدة ولكن الاهمية في الفرق السنية التي تحتاج للاهتمام في الناشئين والشباب وديل كلهم جاريين في الحلة ساي مافي اشبال ولا غيره مع انو دي اخطر مرحلة عشان كده ما عندنا مستقبل.

…………………..؟

انا ما بعيد من المنتخبات الوطنية برغبتي.. بل تم ابعادي لانو الاتحاد ما عايز الكلام الصاح.. الناس عايزاني اكضب.. بعدين انا ما راغب.. تفتكرني الان لو قالوا لي تعال يا الفاتح النقر امسك المنتخب ح افرح واتكيف زي ديل ؟ اكون عايز اضيع زمني ساي وانا عارف اني ما ح انجح.. ديل كلهم بغشو نفسهم وما ح يحققوا اي نتائج.. وما ح يحققوا ابدا لانو الاساسيات المساعدة على تحقيق النجاح غير موجودة.. وانت عشان تنجح في المنتخب لازم اللاعبين المختارين يكونو مروا على مدراس سنية لا تقل عن ست سنوات وده لاعب بتكون عنده ثقافة داخل الملعب وده ممكن تنجز معاهو لكن نحن بنجي نشتغل مع لاعبين ما بيعرفو يثبتو الكورة وعندهم مشكلة في الاستلام والتسلم في الهلال والمريخ والمنتخب.. دي البصلحا منو.. المدارس.. لكن هو جايينا عمرو فوق العشرين ده نعمل بيهو شنو.

…………………..؟

الحصول على الشان او المركز الثالث ليس انجازاً.. بطولة الشان دي اصلا خلقوها للسودان عشان يفوز بيها وبرضو ما فاز بيها حتى داخل ارضه.. منتخبنا بيلعب في الشأن بالمنتخب الاول عكس المنتخبات الآخري التي تشارك باللاعبين المحليين.. السودان بيلعب بى منتخبو الاول لانو ما فيهو محترفين وديلك بيلعبو بالمحليين وبرضو ما فزنا بالبطولة.. وبعد ده بنجي التالت.. ديل لو لعبو بالاساسيين نحن العاشر ما بنجي.. فشلنا فشل فاضح في الشان.. المغرب لو جاتنا يدونا 13 صفر.. الشان ده مفروض يلعبو فيه ابناء المستقبل دي بطولة بتاعت اكتشاف لاعبين جدد ونحن هنا فهمنا ليها غلط.. مفروض يلعبو في الشان ناس الثعلب والنعسان وغيرهم عشان مستواهم يتطور شنو جايب لينا بشة والشغيل في بطولة الشان دي فضيحة.. الناس بضحكو علينا.. نحن فرحانين بالمركز الثالث لاننا جهلاء وما عارفين وضعنا.. دي بطولة اكتشاف مواهب تجيبو لينا الناس الكبار.. ح تكتشف منو.. ؟ وبعد ده ما بنحقق نتائج.

…………………..؟

الدوري عندنا في السودان ضاغط ولا يمكن كشف الاندية يكون فيهو 25 لاعب.. ممكن نوافق على الكلام ده لو الدوري مريح.. الاتحاد عايز الاندية تستفيد من اللاعبين الموجودين مع اضافة خمسة من الشباب.. اشراك هؤلاء الواعدين من مصلحة الكرة السودانية.. هم الشباب ديل ما لاعبين صغار لو ما لعبو في الدوري الفائدة منهم شنو.. الدوري ضاغط.. انا ضد المجموعتين في الدوري لانو ما فيها عدالة.. ده يكون دوري كيف وانا ما قابلت كل الفرق.. ده ظلم.. حتى التسويق ميت والنادي ما بيلاقي القمة طيب فائدة الممتاز شنو؟ كيف الفريق يهبط وهناك فرق معه في المنافسة لم يقابلها انا انزل على اي اساس .. عشان كده مافي عدالة.. قلت هذا الكلام للبروف شداد.. قلت ليهو الكلام ده لو مشى للاتحاد الدولي لن يوافق عليه لانو الدوري شرطه ان الاندية تلعب مع بعضها مرتين يعني مثلا نحن في اهلي شندي لعبنا مع المريخ اربعة مرات وفي نفس الوقت في اندية لا لاقيناها ولا لاقت المريخ.. في دوري في العالم كلو فيهو كده..


…………………..؟

اهلي شندي ليس وحده تراجع في مستواه.. مشكلة الاعلام بعاين لاندية معينة ويقيس عليها الاراء.. وين الخرطوم الوطني.. مستواه موش نازل.. هلال الابيض موش مستواه نازل.. الهلال والمريخ ايضا مستواهما نازل.. يبقي هذا هو مستوى الكرة السودانية.. كلو في النازل.. لانو الاستمرار في الدوري بالطريقة دي ح ينتهي من حاجة اسمها لاعبين.. الدوري بتاعنا ليهو اكثر من ست سنوات ضاغط جداً .. اللاعبين ديل ح يموتو.. مستواهم اصلا انتهي وبعد ده نجي نلعبهم محلي ودولي ومنتخب وطني.. اللاعب السودان حسب دراسة اجريت على الوضع العايشين فيهو البيئة حقتنا مفروض يلعب مباراة واحدة فقط في الاسبوع والا لن يتحمل وانا بتحدى اي زول يجي يقول كلامي ده ما صحيح.. انتوا قايلين دي اوروبا .. اللاعب الاوروبي جاهز وعندو عضلة وعملية البناء تمت من بدري ممكن عادي يلعب مباراتين او ثلاثة في الاسبوع .. لكن وين الخبراء البقولو الكلام ده .. حتى الاتحاد العام بتاعنا فيهو منو ؟ ناس حميدتي وعديتي بالله دي يجو يتفاوضو مع شداد كيف ؟!!.. شداد ذاتو بالنسبة ليهم هرم كبير.. هسه شداد ده لو عايز يتفاهم مع حسن برقو مثلا ح يتفاهم معاهو كيف ؟ كدي قول لي !! يا جماعة الكلام ده ما معقول .. انا قلت الكلام ده قبل كده.. شداد عشان يمشي صاح لازم يكون معاهو اتنين شداد تاني.. كده الكورة بتمشي.. لذلك انا بقول انو شداد كان محتاج لى ناس يقوم باختيارهم بنفسه لكن الغلط في انو شداد ذاتو جابتو الحكومة لكن هو كان يشترط.. يا حكومة انت عايزاني.. خلاص انا اجيب ناسي.. ما ممكن تجيبو لي ناس واحد فاهمني مافي ونقعد يوميا في خلافات وصراعات.

…………………..؟

السودان في ظل السياسة الرياضية التي تنتهجها الدولة ما ح يكون عندو اي كورة ولا رياضة لانو ما يحدث الان مسئولية الدولة وليس الاتحاد.. الدولة هي التي تخطط للاتحاد وليس العكس الان الاتحاد يخطط للدولة .. هسه في السعودية والامارات وقطر وغيرهم التخطيط مسئولية الدولة ممثلة في وزارة الشباب والرياضة او المجلس الاعلى للرياضة الا في السودان وزارة الشباب والرياضة بجيبو لينا ناس في الوزارة لا لعبو كورة لا عندهم بيها علاقة.. ما ممكن الدولة تجيب لينا زول من الغابة من الحرب عشان يمسك الرياضة.. السودان بعيد من التطور في الرياضة لانه لا يملك الآلية ولا المعينات خاصة المعينات البشرية لانو الناس البعرفو الكورة والرياضة قاعدين في بيتهم .. ياخي لما تلقى جكسا قاعد في بيتو وعمر التوم قاعد في بيتو ويوسف مرحوم في بيتو طيب الشغال الكورة دي منو ؟ معقول تجيب لي حميدتي ونمتي ؟!! يا جماعة اخجلو ياخ .. ادو الخبز لى خبازو .. في مصر القريبة دي الامور بتاعت الرياضة عند الرياضيين.. الدولة تدي الرياضيين حقهم واذا فشلوا هي تعمل الدايراهو لكن انت ما خضت التجربة اصلا انت بتجيب ناس ديرو الكورة وهم ما بتاعين كورة.. لازم الوزير يكون مختص عشان المسألة تمشي.. المسألة في يد الحكومة والاتحاد يقعدو مع بعض ويتم التنسيق.. غير كده مافي امل.

…………………..؟

انا بعرف كورة.. المستوى الظهر بيهو السودان ده امام السنغال مضحك.. نحن كل سنة بخسر وهيبتنا مفقودة وما عندنا مظهر.. النيجر ياخي مشى لى قدام لانها بتخطط.. الحكومة بس بتخطط لى انقلاب.. مافي تخطيط تاني يعني.. لازم الناس تخطط لكل الحاجات.. ما ممكن رئيس لجنة المنتخبات يكون حسن برقو والمنصب ده منصب فني.. ده شيء ما ممكن .. ده منصب ما عندو علاقة بالقروش.. رئيس لجنة المنتخبات ده اعلى زول فني في البلد.. انت بتهين الناس الفنيين في السودان وبتهين سمعتك.. لكن السودان ماشي كده عندك قروش تعمل الغلط وزول يسألك مافي.. طيب ليه المصريين ما فيهم ناس عندهم قروش.. ياخي ديل لو عايزين معلق للكورة لازم يكون لعب كورة.

NO COMMENTS

LEAVE A REPLY