الفاتح النقر يطالب بالانغلاق محلياً ويقول: حصولنا على البطولات لن يتم الا بـ(الصدفة).. !!

0
163


الفاتح النقر يطالب بالانغلاق محلياً ويقول: حصولنا على البطولات لن يتم الا بـ(الصدفة).. !!

الهلال افضل فريق في السودان ولديه لاعبين جيدين ولكن الطريقة التي يدار بها فنياً خاطئة

قال الكوتش الفاتح النقر المستشار الفني لنادي الاهلي شندي ومدرب الهلال السابق في ختام حواره المطول مع (المشاهد) بان المخرج الوحيد للكرة السودانية هو الاعتماد على المدارس السنية والبداية من الاساس مبينا بانه اذا لم يحدث ذلك فليس هناك اي امل في تطور الكرة السودانية مشيرا الى حصول السودان على البطولة لن يتم الا بالصدفة واضاف: الهلال الان هو افضل فريق في السودان ولديه لاعبين جيدين ولكن الطريقة التي يدار بها الهلال فنياً هي طريقة خاطئة.. واضاف: (وانتوا بتمسكوا الهلال لمن يلعب هنا محليا ولما يغلب المريخ ويغلب اهلي شندي.. وننسى انو الهلال لعب (6) مباريات في الكونفدرالية وما قدر يهزم اي تيم.. ومع اندية مفروض تكون في متناول يدنا.. حقو نخجل..)
وعن الاسباب التي وقفت عائقاً امام تحقيق الهلال لاي انتصار في المجموعات وهل للامر جوانب نفسية قال النقر: (السبب فني.. ليس هناك اسباب نفسية.. المصري البورسعيدي افضل من الهلال وافضل من المريخ وافضل من اي تيم سوداني.. لانو لاعبي المصري متعلمين كورة.. صحيح لاعبي الهلال خاماتهم كويسة ولكنهم يفتقدون الثقافة الكروية ما بيعرفو كيف يدافعو ولا يعرفوا كيف يهاجمو.. وده تعليم لازم يتم من تحت.. انا بتكلم التاكتيك داخل الملعب والمشكلة دي ما قديمة بدليل انو السودان كان عندو اشراقات والمدرب مازدا بوصل بالمنتخب السوداني الى النهائيات الافريقية مرتين.. لكن انا هنا اتحدث عن المبدأ الاساسي في كرة القدم.. نحن ممكن بالصدفة نشيل بطولة.. ونغلب كذلك بالصدفة لكن لازم نتكلم عن الاستمرارية.. يعني مثلا نشوف الكرة السعودية ما ممكن مستواها يهبط لكن السودان يوم تلقى الهلال فوق ويوم تحت لانو المستوى ما ثابت.. والفارق دائما بيظهر في المشاركات الخارجية.. واذا لم نعلم اولادنا من سن صغيرة تبدأ من العاشرة الكرة السودانية لن تتطور ابداً.. هذا شرط اساسي ولابد من التدريب العلمي والتدريس والاهتمام بكل الجوانب من تغذية وخلافها.
وقال النقر في ختام حديثه بانه من انصار اغلاق مشاركات الاندية السودانية داخليا الى فترة يتفق عليها الخبراء والمختصون في كرة القدم حتى لا تجئ مشاركاتنا سنوياً من اجل المشاركة.

ترك الرد

Please enter your comment!
Please enter your name here