مشاوير/ حسن عبد الرحيم/ الكفتة فيها كم رزة

0
58

=محادثة مع اخ وصديق عزيز جمعتنا سويا تحدثنا في عدد من القضايا الفنية والاجتماعية والرياضية و السياسية
، قال لي الايام دي شايفك بقيت سياسي وبتكتب فيها
، قاطعته قائلا انامابحب السياسة
عارف ليه مابحبها لأن معرفتي بيها زي معرفة حبوبتي الله يرحمها نفسية بت صالح باللغة الصينية والالمانية
=ولو لي مراد اغني كما غني شعبان عبدالرحيم انا بكرة اسرائيل وبحب عمرالدقيرومولانااسماعيل التاج ومدني عباي مدني واغني انا انا بكرة السياسة وبحب الكورة والفن مع انة لاكورة لافن بس الحمدللة
=الكورة مغصة ودموع وبكاء وتشنجات واساءات وهتافات وتجريح وسب ولعن والمحصلة صفر ومليارات تدفع في لاعبين مواسير وفشنك ومحترفين خردة ومدربين علية العوض ومنة العوض
، وبالأمس شاهدت مباراة المريخ وشبيبةالقبائل الجزائري وماعارف ليه تزكرت مقولة دروايش لاقومداح غايتوحاجة تخجل
=اما الفن حاجات تحير وغني هابط وفنانين فجاءة بقوا في التوب وكبار انحسرو خوفا من المسخرة الحاصلة والشلب وغنا الخالات والجبنات والتسريحات والتقليعات واغاني الظار واسماء لفننانين وفنانات تقول اسبير عربات وهذة الاشياء سنعود لها لاحقا انشاءالله
=اها نعود تاني من تاني والقاك ياحبيب عمري وتلقاني بالمناسبة دي اغنية للفنان الجميل محمد ميرغني ربنا يمد في عمرة عشان بكرة مافي فنان يجي ناطي والناس تقول الاغنية دي حقتو وزي ماحكي لي احد اقربائي ان ابنة قال لة والله ياابوي فرفور عمل اغنية جديدة حلوة حلا بتقول ماقالو عليك حنين بس نان ويني الحنية فضحكت وقلت لة ياابني دي اغنية لثنائي العاصمة غنوها في عرسي لامك
=البلد بقت هائصة ومافي حفظ لتاريخ من ابدعوا واجادو

=اها نعود لصديقي الذي قال لي صديقي نحن لا نشترى الوهم.. والكل ويعرف أن الزمن تغير، ويعرف أن الحياة والناس تغيرت. ففكرة شراء الوهم غير واردة. فنحن لايباع لنا الوهم ولانشترية
=قلتا لة يعني انتو مفتحين للدرجة دي
=قال ضاحكا نحنا اولاد قلبا ونحنا الضربنا الهواء بوهية ونحنا مفتحين جدا وبنعرف الكفتة فيها كم رزة وشوال الرز بعمل كم كفتة وماحدث في السابق لن يتكررولن يحدث
=قلتا لة ولكننا نحن للماضي وايام زمان وحاجات زمان وحب وريدة زمان لما كنا نرسل الجوابات الغرامية وننتظر الرد مع بت الجيران الصغيرة
=واحد كتب خطاب غرامي لاستاذة وكان ملئيا بالاخطاء اللغوية وكان الرد منها اعد
=ولاننا مفتحين واولاد قلبا وونحنا ونحنا ونحنا ونحنا الساس والراس ونحنا العملنا
وسوينا وضحكنا وبكينا
=برضو ورغم كل ذلك في زول يستطيع الاجابة علي سؤالي
=الكفتة فيها كم رزة
، اخرالمشاوير
، زي ماوعدتكم بنشرحكاية الدكتورالجميل على الكوباني والفخيم كمال ترباس فلنقراماحدث ماكتبه دكتورالكوباني
،
زمان يا أحباب..لمن بديت اكتب وألحن الاغاني..وكمان مرات مع الغنا في الحمام..عجبني صوتي(وطبعا دي مصيبة بتحصل لناس كتار انهم ينطربوا لصوتهم دون ان يدروا ان أنكر الاصوات لصوت الحمير..لمن تستغرب لشجاعتهم في الغناء امام جمع من الناس.. وحقيقة هنا الجمل ما بشوف عوجة رقبتو ..).. أها قلت يا ود أنت ليه ما تبقى فنان..وتعمل ليك عمة كبيرة زي بتاعت الحبيب الفخيم كمال ترباس ..وأهو الواحد يقبض عداد زي بتاع ترباس (عداد ككو ما بنطوو)..والواحد يبطل شغلة التشريح القال عليها قدوم كلب بأنها ما شغلة اولاد ناس..وبدل الواحد يطلع رزقو من حنك الميت..
وقلت كمان الواحد يشتغل في بيئة عمل اكثر فرحاً وجمالاً ونظافة..والزبائن بجوك في ابهى زيي وميك آب واجمل عطور…..
مش زينا..لمن قال علينا الحبيب الراحل د.عوض دكام رحمه الله..ياهو حالكم..عفانة البيت..ورشوه بالفليت
اها انتظرت اول ما جاني ترباس وبعد ما شربنا الشاي ورووق..قلت ليهو يا قوون يا اصلي..يا سيد الشي..انا قررت ابقى فنان..وعايز دعمك
قام طوالي قال لي شوف يا كوباني..لو تجاوزنا عن صوتك الكعب ده..وتميناهو بتعلية المزيكة والايقاع..حتكون مشكلتك الكبيرة في الغلاف..
(اخخ ضربة حرة مباشرة )..
على العموم انا لا زلت افتكر انو ده كان حقد من ترباس وهو خاف من المنافسة عشان كده حطمني
اها يا أحباب..مع بشريات قرب الاتفاق مع المجلس العسكري..النصيحة للاخوان في قوى الحرية والتغيير وتجمع المهنيين انه في اختياراتكم لمجلس السيادة والحكومة..بالله ما تشتغلوا (بالغلاف) والوهم بتاعين النضمي..وركزوا لينا في الجوهر وقوة الشخصية والقدرة على القيادة والريادة ورجم المفسدين..
وتذكروا ان الشعب السوداني نساء ورجال وشباب ثورة هم أسود ..فلا تجعلوا من يقودوهم أرانب..
#أحسنوا_اختيار_الحكومة

ترك الرد

Please enter your comment!
Please enter your name here