دكتور محمد أحمد صديق يصرخ…

0
120

عزيزي المواطن الزعلان من الأطباء :-
* انت عارف انه الأطباء ديل ما عندهم وظائف.. يعني ٩٠٪ منهم متطوعييين… يعني شغالين مجااان؟ والله جد.. واذيدك من الوجع كيلتين،، بدفعوا للحكومه رسوم تدريب كمان.
* انت عارف انه مافي سكن للأطباء ديل؟
* تاني…عارف انهم متطوعين.. يعني شغالين مجان؟
* عارف انه بمشوا المستشفيات دي وما موفرين ليهم ترحيل؟
* عارف انه ماعندهم تأمين صحي يتعالجوا كان جاتهم كرونا ولا غير كرونا؟
* عارف انه الأطباء ديل عشان خايفين يعادوا أسرهم طالبوا يسكنوهم ومستعدين يبعدوا من أسرهم طوال فتره كرونا؟
*عارف انه الدوله ما وفرت ليهم السكن عشان يسكنوا بعيد من أسرهم عشان ما يعادوهم ؟
*تصدق انه في خيرين اتبرعوا بي اجار شقق ليهم.. وأصحاب العقارات رفضوا يأجروا ليهم؟
* تصدق انه في أصحاب شقق لما عرفوا ديل أطباء طردوهم؟
* عارف انه الأطباء الشغالين ديل ما الحكومه ما موفره ليهم حتى الإفطار.. وبفطروا عن طريق مبادرات؟
* عارف انه هسه تم الاعتداء على الأطباء الشغالين في ام درمان وفتحوا راس طبيب، طبيب شغال لله،، بدون اي حمايه ولا ضمان لي صحته، ولا لي أسرته وجاي المستشفى بي طريقته؟
* تصدق انه الاطباء ديل بحكم انه ماعندهم وظائف ماعندهم ضمان اجتماعي، يعني البموت فيهم أسرته بتاكل نيم، معاش ساي ماعندهم؟
* تصدق انه مافي قانون يحميهم من الاعتداء، والحكومه ما بتلكك في تشريع قانون يحميهم؟
* عارف انه في ناس بتدس اعراض الكرونا من الأطباء وبتعرضهم وغيرهم للمرض؟
* عارف انو لحدي الان فقدنا اكتر من 5 اطباء شهداء بي كرونا و وزاره الصحه ما طلعت ليهم نعي حتى؟
* عارف انه في عدد كبير جدا من الأطباء سقطوا مصابين واتعزلوا في كل انحاء السودان بي سبب عدم توفر سبل حمايه، ولانه الناس بتخفي أعراضها منهم؟
عزيزي المواطن الحانق :-
* الاطباء ديل بشر ما ملائكه الدوله ما موفره ليهم اي شي… * ياخ حمايه شخصيه ماف.. مرتبات ماف.. ترحيل ماف.. * تأمين ليهم ماف.. تأمين لي أسرهم ماف.. طيب سكنوهم عشان ما يمرضوا أسرهم، برضه ماف… طيب ما تعتدوا عليهم على الاقل..
عزيزي المواطن :-
انت قدمت شنو لي زول بقدم التضحيات دي؟
فكرت تشيل فطورك ولا تشيل ليك قاروره ابري ساي تديها القاعدين شغالين في المستشفيات بلا فطور ديل؟
وجاي تلوموا لما ينكسر كإنسان خايف على نفسه وأهله وما لاقي لا شكر لا تقدير.. وبتدقا كمان..
*** اللهم إنا نشكو إليك ضعفنا وقله حيلتنا وهواننا على شعبنا وحكومتنا..
يا الله لطفك.. وسترك..
ارحمنا بالتقدير.. او بالنيزك.

اترك رد